ကမ်းလွန်ပင်လယ်များ (၂)


(တစ်)
ဖြောင့်မတ်ခြင်းအကြောင်းကို ဂုဏ်ပြုပြောဆိုကြတိုင်း တံစဉ်တစ်ချောင်း၏ အသုံးကျမှုကို မော်မကြည့်ရဲလောက်အောင် အားနာလှပါသည်။
အမှန်တရားကို အ်ေကြီးဟစ်ကျယ် ရှာနေသူတွေနဲ့ တွေ့ရတိုင်း ဓမ္မစက္က ပဝတ္တနသုတ် (ဓမ္မကြာ) ကို အကြိမ်ကြိမ် တောင်းပန်စကား ဆိုမိပါသည်။

(နှစ်)
တချို့အခြေအနေများမှာ လူတိုင်း ကင်မရာဖက်မျက်နှာပေးပြီး ပြုံးပြခွင့် မရကြပါ။
(ဥပမာ စားပွဲမှာဝိုင်းပြီး ဘုန်းကြီးဆွမ်းကပ်ကြရသောအခါ)
တချို့က ကျော၊ တချိ့က လက်မောင်းသာ ဓာတ်ပုံထဲမှာ တွေ့ရပါသည်။
ထိုသူတို့၏ ကျော၊ လက်မောင်းများလည်း ပြုံးနေကြသည်ဟု ထင်ပါသည်။

(သုံး)
နှစ်ရှည်လများ နေထိုင်ခဲ့သော ရွာကလေးမှ ကျနော် နှုတ်ဆက်ထွက်ခွာခဲ့ သည်။
ရင်မှာ အမှတ်တရတို့များစွာရှိသည်၊ သို့သော် သူများကို ပြစရာတော့ မရှိပါ။
ထို့ကြောင့် ကမ်းမှ မခွာမီ လှေပေါ်မှနေပြီး ရွာကလေးကို အမှတ်တရ ဓာတ်ပုံ လှမ်းရိုက်လိုက်သည်။
တကယ်တော့ ကျနော်ဓာတ်ပုံ ရိုက်ချိန်မှာ နေဝင်စပြုနေပြီ ဖြစ်သလို ရွာ ကလေးသည်လည်း တောင်တန်းကြ်ီးနောက်ကွယ်မှာ ရောက်နေပြီဖြစ်ပါ
သည်။

(လေး)
မိတ်ဆွေများက ကျနော်နေခဲ့သော ရွာကလေးကို ပြပါဆိုတိုင်း ထို ဓာတ် ပုံလေးကို ထုတ်ပြမိပါသည်၊ (ပြစရာဆိုလို့လည်း ဒါပဲ ရှိပါသည်)
"ဟင် မင်း ရွာက ဘယ်မှာလဲ၊ ဒါက တောင်တန်းကြ်ီးပဲ ဥစ္စာ" ဟု ပြောကြပါသည်။
"ငါ နေထိုင်ခဲ့တဲ့ ရွာကလေးက အဲဒီတောင်ကြီးရဲ့ ဟို ဖက်မှာ"
"ဟာကွာ မင်းဟာကလဲ" လို့ ပြောတတ်ကြပါသည်။



ကျနော့်အတွက်တော့ တောင်တန်းကြ်ီးနောက်ကွယ်မှာ ကျနော် တကယ်နေထိုင်ခဲ့သည့် ထို ရွာကလေးရှိနေကြောင်း သေချာလှပါသည်။
သို့သော် ဓာတ်ပုံထဲမှာတော့ တောင်တန်းကြ်ီးပဲရှိနေကြောင်း ဝန်ခံပါသည်၊
ထို့အတူ ထိုဓာတ်ပုံလေးသည် ရွာကလေးကို ပြပါဟု ပြောလာလျင် ပြဖို့ အတွက် ရိုက်ယူခဲ့သော ဓာတ်ပုံဖြစ်ကြောင်းလည်း ကျမ်းသစ္စာဆိုရဲပါသည်။

အမှာ။ ။ ကမ်းလွန်ပင်လယ်များ (၂) ဆိုသဖြင့် ကမ်းလွန်ပင်လယ်များ (၁) ရှိသည်ဟု မထင်မှတ်စေလိုပါ။
(08/01/2014) 

Post a Comment