"ဦးသိန်းစိန်ဦးဆောင်တဲ့ စစ်တပ်အစိုးရက ပြုပြင်ပြောင်းလဲရေးကို တကယ် လုပ်နေတယ်လို့ ယုံကြည်သလား"
"အမှန်တကယ် ဦးဆောင်နိုင်မယ့် အရည်အချင်းရှိတယ်လို့ ယုံကြည်သလား "
"ဘယ်ပါတီကို ထောက်ခံသလဲ"
မကြာမကြာ မေးတတ်တဲ့ (အမေးခံရတဲ့) မေးခွန်းမျိုးတွေပေါ့။
နောက်ဆုံးကစဖြေရရင်
၃။ ပါတီမစွဲပါ။
၂။ စောင့်ကြည့်မှ သိကြရမှာပါ။
၁။ ပြုပြင်ပြောင်းလဲရေးကို တကယ်လုပ်နေတယ်လို့ လတ်တလော ယုံကြည် လို့ ရပါတယ်။ ဒါပါပဲ။
သူလည်း သူ့အသံနဲ့သူ
ကိုယ်လည်း ကိုယ့်အသံနဲ့ကိုယ်
အော်ကြတယ်
ပျော်စရာမကောင်းဘူးလား။
သူလည်း သူ့ဝေဒနာနဲ့သူ
ကိုယ်လည်း ကိုယ့်ဝေနာနဲ့ကိုယ်
ပျော်ကြတယ်
အော်စရာ မကောင်းဘူးလား။ ။
ကိုယ့်အသံနဲ့ကိုယ် မအော်ခင် မဟေသီ မဂ္ဂဇင်းထဲက ဆရာ မိုးမြင့်အောင်ရဲ့ ကဗျာလေးကို ကိုးကားကြည့်လိုက်မိတယ်။
ဘယ်ကစရမလဲ။
မျှော်တော်ယောင် စင်္ကာပူရောက် မြန်မာသမ္မတ တစ်ယောက်ရဲ့ ဝိဋဋူပ ဆန်ဆန် ဇာတ်လမ်းက စလိုက်ရမလား။ မင်းရဲ့ ညီတော်တွေ တောကစား ထွက်နေလို့ မင်းကို အရိုအသေပေးမယ့် မင်းညီမင်းသား မရှိတာပါလို့ ချွေး သိပ်တာမျိုးလား။ မင်းက အရိုအသေပေးရမယ့် မင်းရဲ့နောင်တော်တွေတော့ လာကြပါလိမ့် မယ်။ ဒီလိုလား။
"ငိုသံ ဟိုတစ်ဖက်မှာ ကြုံးဝါးသံ ဆိုတာရှိတယ် ရှိတယ်" ဆိုတဲ့ ဆရာကြီး စိုင်းခမ်းလိတ်ရဲ့စကား၊ စိုင်းထီးဆိုင်ရဲ့အသံသာ မှန်ခဲ့ရင် အကျယ်ကြီး မ ဟုတ်ပေမယ့် ကြုံးဝါးသံသဲ့သဲ့တော့ ခံစားတတ်ရင် ကြားလို့ရနိုင်တယ်။
စထရိတ်တိုင်းက ပေးတဲ့ဆုကို ကိုယ်တိုင် တက်မယူခဲ့တာ (ဘာလုပ်ဖို့လဲ)၊ စလုံး သံအမတ်က " ဒေါ်စုနဲ့တွေ့ရဖို့ကလည်း သိပ်ခက်တာပဲ " ဆိုတဲ့ ကြား ရတဲ့ စကားသာ မှန်ခဲ့ရင် မြန်မာတွေ နိုင်ငံခြား ဆက်ဆံရေးသင်ရိုးကျေ တယ်လို့ ပြောရပါလိမ့်မယ်။
ဘယ်ကစရမလဲ။ လူထုနှလုံးသားထဲရောက်ဖို့ ( လူထုအကုန်တော့ ဘယ် ဟုတ်ပါ့မလဲ၊ သိကြားမှတ်လို့ ) ဗီလိန်ကနေ ဟီရိုးဖြစ်အောင် လွှင့်ရတဲ့ လေ ဆန် ရေဆန်ခရီးက စလိုက်ရမလား။
မြန်မာတွေကပဲ အညှာလွယ်၊ သနားလွယ်၊ ပြီး ပြီးရောတွေ မို့လား။
ဦးသိန်းစိန် အရင် ဗိုလ်ချုပ်ကြီးတွေထဲက ပြောင်းလဲရေးကို လိုလားတဲ့ စစ် တပ်အရာရှိတွေ မရှိခဲ့နိုင်ဘူးလား။
ဘာမှ ကောင်းတာမလုပ်ခဲ့တဲ့လူကတောင် သေခါနီးရင်တော့ သူ့ကောင်း ကွက်လေးတွေရှာကြည့်ပြီး လူထုက သူ့ကို သတိရနေတာမျိုး တောင့်တ တတ်တယ်လို့ ဆိုကြတယ် မဟုတ်လား။
ပြောင်းလဲချင်ပေမယ့် ပြောင်းလိုက်ရင် ပြန်ပေးရမှာတွေကများလွန်းတော့ သေချာအောင် လုပ်ရင်း လုပ်ရင်းနဲ့ မသေချာလိုက်ဘဲ သေကုန်ကြတာလား။
လက်လှမ်းမီသမျှလေး နှိုက်ကြည့်လိုက်ချင်လို့ပါ။ စိတ်ရှည်တတ်ရင် စောင့် ဖတ်ကြပေါ့ဗျာ။
အခုတော့ သစ္စာနီ ပြောသလို " မင်းသားက ရွှေမန်းသား အကြီးကောင်၊ ဇာတ်ကားနာမည်ကတော့ အဖေလာမှ သိမယ် " နဲ့ အလုပ်ရှိနေလို့ နား လိုက်ပါဦးမယ်။
ဇင်ဝေသော်
Post a Comment