ဇင်ဝေသော်, အမှတ်တရ -Posted on 11/18/2012
(တစ်ရက်နောက်ကျသွားတယ် ဗျာ)
ရာသီက သံစဉ်ညှိနေတုန်း
ကင်ဆာက လက်တံရှည်သလောက်
သေခြင်းတရားက လက်ရဲဇက်ရဲ ရှိလွန်းတယ်
ကြယ်ကြွေတဲ့ညတွေ လွန်ပါစေ။
ကြိုးကြာတွေ ရောင်စဉ် ( ၇ ) သွယ်တန်းတော့
မဟာဆန်တဲ့ ပန်းခရမ်းပြာတွေ ဝေးကွာကုန်တယ်
သူများ ခူးပြီးသားပန်းကို မနမ်းလိုသူကိုမှ
ပွတ်တိုက်သွားတဲ့ စမ်းချောင်းလေး ရယ်။
" ရင်ထဲဝင်ရောက် ကူးစက်တဲ့
ပြင်ပဇီဝ ပိုးမွှားကြောင့် "
ဖြစ်တည်မှု မြစ်တစ်စင်း ဘင် ခဏ ဆိုက်လေရော
"ခေါ်မနေ နဲတော့ ဒီတစ်ခါရောက်ရင်
သွားခွင့်ပြုဦး ခွင့်ပြုပါဦးလေ "
" တမင်တကာ ဒုက္ခ
ပြေစေ ပြောလို့ သိမ်းရုပ် လိုက်စို့ "
" တဖြည်းဖြည်းနဲ့ တို့ခြေလှမ်းများ ရွေ့နေ
တစ်နေ့နေ့တော့ ရောက်မယ် လှမ်းတဲ့ လမ်းရေ
ရှိရှိသမျှ တို့ ခွန်အားနဲ့ ရှေ့ကို "
မိုးမခပင်တွေ အပျိုဖော် မဝင့်တဝင်
" လွန်ခဲ့သောနေ့ " သံစဉ်ကို ဘာလို့များ တီးခတ်ရတာလဲ ဗျာ။
ကိုမွန်းအောင် ပို့လာတဲ့ သွေးနီရောင်မုန်တိုင်းကို
မဇ္ဈိမလှိုင်းက စိုက်ပျိုးထား ဆို
မှိုင်းညို့ကာ တောင်ရဲ့နောက်ကွယ် နေဝင်တော့
တောင်ဖက်မုခ်က လှေကားထစ်တွေကို ရေတွက်လို့ မရတော့ဘူးပေါ့
ဘာပဲ ဖြစ်ဖြစ်
ရိုးရိုးလေးတော့ လွမ်းပါရစေ ဗျာ။
မန္တလေးတောင် မရှိ
ငြိမ်းကျော် မရှိ
မဇ္ဈိမလှိုင်း မရှိ
ခင်မောင်တိုးမရှိ
( အဲသလိုဆို )
ဒီ စင်္ကာပူမှာ
ရိုဘော့တစ် နှလုံးသားပဲ ရှိမှာပေါ့ လို့
ကမ္ဘာမကျော်တဲ့ ကဗျာတစ်ပုဒ် စပ်ဖူးပါတယ်။
ဒီက ကမ်းလိုက်တဲ့ တို့ လက်ကို မင်း
ဆုပ်ချင်ဆုပ် ပုတ်ချင်ပုတ်
မျှော်ကာလွမ်းမိတဲ့ ညဖက်ဆို
တေး ရေးချင်ရေး ဆိုချင်ဆို "
သံစဉ်တော့ ချိုချင်မှ ချိုမှာပေါ့ မျက်သွယ်ရတနာသူ။
" ရင်မှာ လှိုက်ခတ် ကျပ်တင်း လို့
ဝေဒနာ ဖြစ်ခဲ့ပြီမို့
တစ်နေရာ ရှောင်ထွက်သွားပါရစေ "
" သွားတော့မယ် မိန်းကလေး................
.....................................................မင်းရှိုက်သံ နားထဲ စွဲနေရဲ့ "
" ကုန်လွန် ရွေ့ သွားတဲ့နေ့တွေ
ပြန်လည် ကိုယ်စားတော့ မရနိုင်ဘူး မေ
မျှော်လေဦး နောက်ကွယ် ဟို................... အဝေးဆီ "
ဝေနှင်း၊ နှင်းဝေ၊ နှင်းဝေ၊ဝေနှင်း။
ကြွေသွားတဲ့ နုပျိုခြင်းများ တဲ့ လား
ကမ်းမဲ့ ပန်းဗေဒါတွေ တဲ့လား
ဘယ်ဆီ ဘယ်မှာ ရည်ရွယ်ရာကို တဲ့ လား
လေးညှို့ရှင် ရွေးရာ ထိမှန်ကြတာပေါ့။
" ကမ်းလက် " ဆိုတာကပင်
မဇ္ဈိမလှိုင်းကို လွမ်းလို့ ရွေးမိတဲ့ မွေးစား နာမ် တစ်ခုပါ
ရိုးရိုးလေး လွမ်းပါရစေ။
ကြယ်ကြွေတဲ့ညတွေ လွန်ပါစေ။
ဒီလိုနဲ့
ကျနော်တို့ ဆက်ရေ နေရဦးမယ့် တောင်ဖက်မုခ် လှေကားထစ်များ။ ။
ကမ်းလက်
Post a Comment