အမေရိကန်သံအမတ်ကြီး ဗုဒ္ဓဘာသာအဖြစ် ခံယူမည် ...

ဗုဒ္ဓဘာသာအတွက်လည်းကောင်း၊ သံအမတ်ကြီးတို့ ဇနီးမောင်နှံအတွက် လည်းကောင်း၊ ထိုသတင်းကို ဖတ်ရ၊ ကြားရပြီး ဝမ်းမြောက်ဝမ်းသာ ဖြစ်ကြရသော ဗုဒ္ဓဘာသာဝင်များ အတွက်လည်းကောင်း သာဓုသုံးကြိမ် ခေါ်ပါ၏။

အမေရိကန်သံအမတ်ကြီး ဗုဒ္ဓဘာသာအဖြစ် ပြောင်းလဲလိုက်ခြင်းနှင့် ပတ်သက်၍ …

အမေရိကန်တို့သည် အမေရိကန်တို့ ဖြစ်သည်အားလျော်စွာ ဘာမှ ထူးထူးခြားခြား တုန့်ပြန်နေကြမည် မဟုတ်ပါ။ ယုံကြည်ကိုးကွယ်မှုဟူသည် လူတိုင်းရွေးချယ်ခွင့်ရှိသည့် လူ့အခွင့်အရေး မဟုတ်ပါလား။

အမေရိကန်သို့ သံအမတ်အဖြစ် စေလွှတ်ခြင်းခံရသော မြန်မာဗုဒ္ဓဘာသာ သံအမတ်ကြီးသည် ပရိုတက်စတင့် ခရစ်ယန်ဘာသာသို့ ကူးပြောင်းသွားသည် ဆိုပါစို့။

ဆိုးဆိုးရွားရွားကြီးတော့ မဖြစ်လောက်၊ “သာသနာဖျက်ကောင်” ဘာညာစသည် မသုံးစွဲကြလောက်ဟု ထင်ပါသည်။ သို့ဆိုလျှင် ကျွန်ုပ်တို့ လူ့အဖွဲ့အစည်းသည်လည်း လူ့အခွင့်အရေးကို လေးစားသော၊ ယဉ်ကျေး၊ ရင့်ကျက်သော လူ့အဖွဲ့အစည်းဟု ဆိုနိုင်ပါပြီ။

မန္တလေးမှာနေစဉ်က အမေရိကန်၊ ဂျာမန် နှစ်ယောက်နှင့် မင်းကွန်းဖက်သို့ လိုက်သွားခဲ့ဖူးသည်။ အမေရိကန်တွေနှင့် အင်္ဂလိပ်စကား ပြောရခြင်းသည် အလွန်ပညာရသောကြောင့် ဖြစ်သည်။

မင်းကွန်းသို့ရောက်၊ လည်ပတ်ပြီး အအေးဆိုင်၌ အအေးသောက်ရန် ထိုင်သောအခါ ဆိုင်က လူရှုပ်နေသဖြင့် စားပွဲထိုးလေးက လက်မအား၊ ကိုယ်တိုင်သွားယူမှ ရမည့်သဘော ရှိနေသည်။ ထို့ကြောင့် လူလည် အမေရိကန်က ဂျာမန်ကို သွားယူပေးရန် ခိုင်းသည်။ ဂျာမန်ကလည်း သူ လူလည်လုပ်သည်ဟု ထင်သဖြင့် သွားတော့ ယူမည်။ သို့သော် ရဟန်းအတွက်နှင့် သူ့အတွက်သာ ယူမည်။ အမေရိကန်အတွက် ယူမပေးနိုင်ဟု ဆိုသည်။

ထိုအခါ အမေရိကန်က အပြုံးမပျက်၊ နှစ်ယောက်သွားရန် မလို၊ တစ်ယောက်ဆို ရပြီ၊ သူသွားမည်၊ သုံးယောက်စလုံး (ရဟန်းတစ်ပါးနှင့် လူနှစ်ယောက်) အတွက် သူ ယူခဲ့ပါမည်ဟုဆိုကာ ထွက်သွားသည်။

အမေရိကန် လူလည်ကျသွားပုံကို ထိုရောက်မှ မျက်ဝါးထင်ထင် တွေ့လိုက်ရသည်။ သူ့အပြုအမူအရ ဂျာမန်ကပင် ကလေးကလား ဆန်သွားတော့သည်။ သူက လူကြီးလူကောင်းဆန်သည်။ “မင်းက ငါ့အတွက် လုပ်မပေးနိုင်ဘူးဆိုရင် ငါကလည်း မင်းအတွက် လုပ်မပေး” ဟူသော ကလေးဆန်မှု သူ့မှာ မရှိ။ လူ့ယဉ်ကျေးမှုအရ ဂျာမန် လုံးဝ ရှုံးသွားသည်။

ထို့ကြောင့် ဆိုခြင်းဖြစ်၏။ အမေရိကန်တို့က မခေကြ၊ ရင့်ကျက်၊ ယဉ်ကျေးကြ၏။

ဤအဖြစ်အပျက်ဖြင့် သံအမတ်၏ ဗုဒ္ဓဘာသာခံယူမှုသည် ဘာသာရေးစစ်စစ် မဟုတ်နိုင်ဟု ကျွန်ုပ် ပြောနေခြင်း၊ စွပ်စွဲနေခြင်း မဟုတ်။ ဗုဒ္ဓဘာသာကို ထဲထဲဝင်ဝင် လေ့လာမိသော ပညာတတ်တို့သည် ဗုဒ္ဓဘာသာစစ်စစ်ကြီးများ ဖြစ်သွားတတ်ကြသည်။

ကျွန်ုပ်ဆိုလိုသည်က အခြားနိုင်ငံများက “အမေရိကန်တွေ ရွှေ့လိုက်တဲ့ အဓိကကျားကွက်တိုင်းဟာ အမှန်တွေချည်းပဲ။ သူများထက် အမြဲတမ်း လက်ဦးနေတာပဲ” ဟု ဆိုလာသော် ကျွန်ုပ်တို့ ပြန်ပြောရန် စကားတော့ ရှိမည်မဟုတ်။

အောက်တိုဘာ (၃၀) ရက်ကျော်ပါက ထိုအမေရိကန် သံအမတ်ကြီးသည် မြန်မာနိုင်ငံ၏ ပေါ်ပြူလာ အဖြစ်ဆုံး ပုဂ္ဂိုလ် (၅) ယောက်တွင် တစ်ယောက် အပါအဝင် ဖြစ်သွားနိုင်ပေလိမ့်မည်။ ယခုပင် သူက ပြည်သူ့နှလုံးသားထဲ ရောက်နေပေပြီ။ သေချာသည်က အမေရိကန်၊ မြန်မာ ဆက်ဆံရေး ပို၍ အားကောင်းလာပေတော့မည်။ သူများကို မဆိုလို၊ သီဟနာဒ မျက်စေ့ထဲမှာပဲ ထိုသံအမတ် ဇနီးမောင်နှံက အရင်က မြင်ဖူးတာထက် ပို၍ ကျက်သရေ ရှိနေ၏။ အမေရိကန်တို့ မခေကြ။ ယဉ်ကျေး၊ ရင့်ကျက်ကြ၏။ တနည်းဆိုရသော် အမေရိကန်တို့သည် political science ၊ Social science တို့၌ကျမ်းကျေ၏။